Paggalugad sa mga Buhay na Karanasan ng Panimulang Programa Para sa mga Bagong Hirang na mga Guro: Mga Hamon, Pagninilay at Propesyunal na Paglago

AUTHOR(S)

MICHELLE A. RANAN

ABSTRACT

—— Ang pag-aaral na ito ay layong siyasatin ang mga buhay na karanasan ng mga bagong hirang na guro sa kanilang paglahok sa panimulang programa ng pagtuturo. Binibigyang pansin ng pag-aaral ang mga hamon, refleksyon, at propesyunal na pag-unlad ng mga guro mula sa Cluster 7 ng DepEd Davao City, na naging bahagi ng Induction Program. Ang research na ito ay may layuning makuha ang mga pananaw ng mga guro ukol sa kanilang mga karanasan at kung paano nakakatulong ang mga propesyunal na programa sa kanilang pagsasanay at pagtuturo. Ang disenyong ginagamit ay phenomenological, na naglalayong tuklasin ang malalim na karanasan ng mga guro sa kanilang unang taon ng pagtuturo. Sa pamamagitan ng kwalitatibong metodolohiya, ginamit ang semi-structured na interbyu upang makuha ang mga pananaw ng mga guro. Sa kabuuan, siyam na guro mula sa iba’t ibang paaralan ang lumahok sa mga interbyu, na tumatalakay sa kanilang mga hamon sa klase, pagsasanay, at ang epekto ng mga programa sa kanilang kakayahan bilang guro. Ang mga interbyu ay inanalisa gamit ang thematic analysis upang matukoy ang mga karaniwang tema na sumasalamin sa karanasan ng mga guro sa kanilang unang taon ng pagtuturo. Ang mga resulta ng pag-aaral ay nagpapakita na ang mga bagong guro ay nahaharap sa mga hamon tulad ng kakulangan sa mga materyales at pagsasanay, hindi sapat na mentoring, at ang pangangailangan para sa mas epektibong mga programa sa pagpapalago ng propesyunal na kasanayan. Gayunpaman, natuklasan din na ang Induction Program ay may positibong epekto sa kanilang propesyunal na pag-unlad, ngunit nangangailangan ng karagdagang suporta at mas pinabuting mga pagsasanay upang matugunan ang mga partikular na pangangailangan ng mga guro. Ang mga guro ay nagbigay diin din sa kahalagahan ng mentoring at pagtutulungan sa loob ng komunidad ng mga guro upang mapabuti ang kalidad ng pagtuturo at mapalago ang kanilang mga kasanayan. Sa kabuuan, ang pag-aaral ay nagbigay ng mahalagang impormasyon ukol sa mga aspeto ng pagunlad ng mga bagong guro at mga rekomendasyon ukol sa pagpapabuti ng mga programa para sa kanilang professional growth. Keywords — Panimulang programa, bagong hirang na guro, hamon, propesyunal na paglago